MARÍA JESÚS VEGA PASCUAL

ACNUR-en Bozeramailea eta Komunikazio Arduraduna Espainian

Gaur egun, ACNURen (Nazio Batuen Errefuxiatuentzako Goi Komisarioaren) Espainiako eleduna eta ACNURen Espainiako Ordezkaritzako Komunikazio Saileko arduraduna da Maria Jesús Vega. Gizarte-langile izateko ikasketak egin zituen Madrilgo Unibertsitate Konplutentsen, eta ondoren alor horretako ezagutzak sakondu zituen Estatu Batuetan, Fullbright Batzordearen bekadun gisa.

25 urtetik gora eman ditu errefuxiatuen alorrean lanean, batez ere Gurutze Gorrian, Erreskaterako Nazioarteko Batzordean eta ACNURen. Errefuxiatuentzako NBEren agentziarekin alor ugari landu ditu: babesa, eragin politikoa, familiak batzea, lagunik gabeko adingabeak, birkokatzea, aberriratzea eta dohain-emaileekiko harremanak, besteak beste. Hurbiletik ezagutu du ACNURen lana Kolonbian, Kongoko Errepublika Demokratikoan, Kenyan, Etiopian, Tunisian, Jordanian eta Erdialdeko Amerikan, eta ACNUReko larrialdi-taldeko kidea da.

  • Ostirala, azaroak 9

    4. SAIOA. ERREFUXIATUEN ERRONKA

  • 09:00  - 10:00
    Errefuxiatuei babesa ematea: erantzukizun partekatua, Errefuxiatuen inguruko Mundu Itunaren arabera
    MARÍA JESÚS VEGA PASCUAL
    Hiru urte igaro dira Mediterraneoko uretan gorpuak hara-hona eta Greziako uharteetan dozenaka mila errefuxiatuz eta migratzailez betetako txalupak erakusten zituzten irudi lazgarri haiek ikusi genituenetik. Orduz geroztik, asko murriztu da Europara heltzen diren etorkinen kopurua. Ez da jaitsi, ordea, Kontinentera heldu nahian egunero itota hiltzen diren gizon, emakume eta haurren zenbatekoa. Halere, Europan kezkaz ikusten ari gara babes-eremua txikitu egin dela, gerratik eta jazarpenetik ihesi datozen pertsonenganako lege murriztaileagoak onartu direla eta besteenganako beldurra, mesfidantza eta gorrotoa elikatzen dituen kontakizun politikoa garatu dela. Politikarien lehentasuna, aldiz, pertsona horien harrera eta integrazioa errazten duen ingurunea eta haiekiko bizikidetza bideratu eta zaintzea izan beharko lirateke, mehatxu bat balira bezala ikusarazi beharrean. Kezkatuta ari gara ikusten azkenaldiko krisialdiek hondatu egin dutela estatuen gaitasun eta aginte morala giza eskubideak defendatzeko, eta politiken helburu bakarra mugen kontrola eta segurtasuna dela. Europan errefuxiatu gutxien zeinek hartzen duen eztabaidatzen den bitartean, mundu zabalean ondoz ondoko 5. urtez gainditu da halabeharrez lekualdatutako pertsonen kopurua, eta dagoeneko 68,5 milioi lagun baino gehiago dira. Errefuxiatuen % 85 egoera ahulean edo garatzeko bidean dauden herrialdeetan dago. Errefuxiatuen Mundu Ituna, 2018aren amaieran onartuko dena, mugarri historikoa izango da. Izan ere, estatuei aukera emango die errefuxiatuen egoerari zuzenean, eraginkortasunez eta aurresateko moduan erantzuteko, hainbat eragile tartean sartuz.




Share

MARÍA JESÚS VEGA PASCUAL