Irak. Dk. MIGUEL ÁNGEL CANO PAÑOS

Penaleko eta Kriminologiako Irakasle titularra. Granadako Unibertsitatea

Granadako Unibertsitateko (Espainiako) Zigor Zuzenbideko eta Kriminologiako irakasle titularra da Miguel Ángel Cano Paños. Horrez gain, Kriminologia Graduko koordinatzailea da unibertsitate berean, Adin Txikikoen Kriminalitateari eta Gizarteratzeari buruzko Master Ofizialeko koordinatzailea eta Elxeko Miguel Hernandez Unibertsitateko CRIMINA zentroko aholkulari zientifikoa. Revista Electrónica de Ciencia Penal y Criminología aldizkariko zuzendariordea ere bada.

Bartzelonako Unibertsitatean Zuzenbide eta Kriminologia ikasketak amaitu ondoren, 1996an Alemaniara joan zen. Bertan, Zigor Zuzenbideko Masterra egin zuen Münsterreko Unibertsitatean, eta 1998an eskuratu zuen titulua. Ondoren, Potsdameko Unibertsitatean izan zen, eta, bertan, Zigor Zuzenbideko Doktoregoa lortu zuen, 2003an.

2008an, Granadako Unibertsitatera joan zen, Ramón y Cajal programaren esparruan. Gaur egun, bertan dihardu irakaskuntzan, ikerkuntzan eta unibertsitate-gestioan, Unibertsitateko irakasle titularra baita. 2015ean, Kriminologia Masterra egin zuen Cano irakasleak, Murtziako Unibertsitatean (Espainian).

Zigor Zuzenbideari eta Kriminologiari lotutako hainbat alderdiri buruzko 60 argitalpen baino gehiago ditu idatzita. Espainiako, Alemaniako eta beste herrialde batzuetako eragin handiko aldizkarietan argitaratu dira horiek. Era berean, 80 hitzaldi baino gehiago eman ditu azken urteetan hainbat herrialdetan, terrorismoa, delinkuentzia antolatua, delituaren ondorio juridikoak, gazte-delinkuentzia eta teoria kriminologikoak hizpide hartuta. Terrorismo islamistari dagokionez, azpimarratzekoa da «Generación yihad. La radicalización islamista de los jóvenes musulmanes en Europa» («Jihad-belaunaldia. Europako gazte musulmanen erradikalizazioa) izeneko obra, Sykinson argitaletxearen bidez 2010. urtean argitaratua.

Cano irakasleak ikerkuntzako zenbait egonaldi egin ditu Espainiako eta beste herrialde batzuetako unibertsitateetan. Horien artean ospe handiko zentroak azpimarra daitezke, hala nola Münster, Potsdam, Berlin, Heidelberg, Fribourg, Viena eta Turkuko unibertsitateak.

  • Osteguna, azaroak 8

    2. SAIOA. GIZA ESKUBIDEEN NAZIOARTEKO ZUZENBIDEA TERRORISMOAREN ERRONKAREN AURREAN

  • 11:00  - 12:00
    Terrorismoa eta adierazpen-askatasuna
    Irak. Dk. Mª LUISA CUERDA ARNAU
    Terrorismo jihadista esaten zaion hori giza eskubideentzako mehatxu globala da, ikuspegi bikoitz batetik. Alde batetik, erakunde eta talde kriminalek bereizketarik egin gabe erasotzen diete pertsonei eta estatuei, orain arte inoiz ikusi gabeko taktika kriminalak erabiliz. Eta, beste aldetik, nazioartean aitortutako eskubide eta askatasunak era onartezinean atzeratzea dakarten estrategiak erabiltzen dituzte demokraziarik sendoenek ere, erronka berri horri aurre egiteko. 2/2015 Lege Organikoak terrorismoaren alorrean Espainiako Zigor kodean eragin dituen aldaketak landuko ditu hitzaldiak. Helburu nagusia, hauxe: agerian uztea aldaketa horiek populismorik lotsagabeenetik abiarazi direla, eraginkortasunaren inguruko ebaluazio zorrotzik gabe ezarri direla eta, oro har, bermeen aurkako ezinikusi sakona dariela. Alabaina, badago hori baino gauza larriagorik: herritarrak onartzen hasiak dira segurtasun nazionalaz ari garenean eskubide pertsonalak alboratzeko aukera dagoela. Kontzeptu asaldatzailea da, berariaz anbiguoa, ia edozertarako aukera ematen duena. Errealitate horren aurrean, funtsezkoa eta ezinbestekoa da giza eskubideak elkarbizitza baketsuaren, zuzenaren eta solidarioaren pizgarriak direlako sineste osoa berreskuratzea gizarte demokratikoek.

    Terrorismo islamistak eragindako ezkutuko mehatxua eta poliziak nola egin behar dion aurre horri. Muturreko hipotesiaren, hiltzeko tiro egitearen, analisi juridiko-penala
    Irak. Dk. MIGUEL ÁNGEL CANO PAÑOS
    Terrorismo islamistak hainbat ezaugarri ditu, ohiko terrorismotik —izaera etno-nazionalista edo sozial-iraultzailea duen terrorismotik, hain zuzen— erro-errotik bereizten dutena. Ezaugarri horiek bitan laburtu daitezke. Lehenbizi, etsaiaren kontzeptua oso zabala da terrorista haientzat, eta ez dute bereizten biktima zuzen eta zeharkakoen artean. Bigarrenik, haien ekintzak zeharo ustekabekoak dira; gainera, ekintza suizidak izaten direnez, oso denbora-tarte laburrean alda dezakete modus operandi edo jarduteko era. Ezaugarri horiek direla eta, poliziak nonahiko, noiznahiko eta ustekabeko mehatxuari egin behar dio aurre. Mehatxu horrek, arrisku handiko egoeretan «hertsapen zuzena» erabiltzearen eta, areago, guztiz ezohikoa den ekintza bat indargabetzeko su-armak erabiltzearen ondorioz, giza bizitza bat suntsi dezake, ustezko terroristaren bizitza bada ere. Azken bi urteetan Katalunian izandako gertaerak egoera horren adibide argiak dira. Gauzak horrela, hitzaldi honen bidez aztertu nahi dugu ikuspegi kriminologikotik eta, batez ere, juridiko-penaletik, poliziak nola erabili behar duen indarra, terrorismo islamistak eragindako mehatxuaren esparruan arrisku handiko egoerei aurre egin behar dionean.




Share

Irak. Dk. MIGUEL ÁNGEL CANO PAÑOS